केभिड डी ब्रुइनले ब्याक्तिगत चार गोल गरेपछि बुधबार इंग्लिस प्रिमियर लिग फुटबल प्रतियोगितामा शीर्ष स्थानको म्यानचेस्टर सिटीले वुल्भर लाई ५–१ गोलले पराजित गरेको छ । जितसंगै सिटीले शिर्ष स्थानमा ३ अंकको अग्रता कायम गर्न सफल भएको छ ।
यस जित पछि सिटी ३६ खेलबाट ८९ अंक सहित शिर्ष स्थानमा रहदाँ समान खेल खेलेको लिभरपुलको ८६ अंक रहेको छ । लिभरपुल दोस्रो स्थानमा छ । अब लिगका २ खेल बाँकी रहेकाले उपाधि होड भने रोमाञ्चक बनेको छ । वुल्भ्स ५० अंक सहित तालिकाको आठौं स्थानमा रहेको छ ।
सिटीको जितमा ४ गोल केभिड डी ब्रुइनले गर्दा रहिम स्र्टलिङको नाममा १ गोल रह्यो । वुल्भ्सका लागि लेन्डर डेनडोकरले १ गोल फर्काउनु भएको थियो ।
पाहुना टोली सिटीका लागि ब्रुइनले सातौं मिनेटमा गोल गर्दै अग्रता दिलाउनु भएको थियो । खेलको ११ औं मिनेटमा लेन्डरले गोल फर्काउँदै वुल्भ्सलाई बराबरीमा फर्काउनु भयो । त्यसपछि १६ र २४ औं मिनेटमा लगातार गोल गर्दै बु्रइनले पहिलो हाफमै ह्याट्रिक पुरा गर्दा सिटीले ३–१ गोलले अघि रह्यो ।
६० औं मिनेटमा ब्रुइनले व्यक्तिगत चौथो गोल गर्दा ८५ औं मिनेटमा स्र्टलिङले टिमका लागि पाँचौं गोल गर्दै फराकिलो जित दिलाउनु भयो ।
