एजेन्सी । भारतीय क्रिकेट टोलीका पूर्व ब्याट्सम्यान तथा कांग्रेस नेता नवजोत सिंह सिन्धुलाई रोड रेज मुद्दामा एक वर्षको जेल सजाय सुनाइएको छ । वास्तवमा कुरा ३४ वर्ष पुरानो हो । २७ डिसेम्बर १९८८ मा पटियालामा विवाद भयो, विवाद पार्किङको विषयमा भएको थियो । जब पीडित र अन्य दुईजना बैंकबाट पैसा निकाल्न जाँदै थिए, उनीहरूले बाटोमा जिप देखे र सिद्धुलाई हटाउन भने । यहीँबाट बहस सुरु भएको हो । यस क्रममा सिद्धुले पीडितलाई कुटपिट गरी घटनास्थलबाट भागेको प्रहरीले आरोप लगाएको छ । पीडितलाई अस्पताल पुर्याएपछि मृत घोषणा गरिएको थियो ।
त्यतिबेला भारतीय टोलीका स्टार खेलाडी रहेका सिद्धुलाई भारतको सर्वोच्च अदालतले सजाय सुनाएको हो । त्यसबेला २५ वर्षीय नवजोत सिंह सिद्धुले कुटपिट गरेका व्यक्ति ६५ वर्षीय गुरनाम सिंह थिए । यस घटनामा गठित चिकित्सक बोर्डले टाउकोमा चोटपटक र मुटुको समस्यालाई मृत्युको कारण बताउनु भएको थियो ।
सन् २००६ मा ३ वर्षको जेल सजाय सुनाइएको थियो
नवजोत सिंह सिद्धुलाई सन् २००६ मा उच्च अदालतले यस मामिलामा तीन वर्षको जेल सजाय सुनाएको थियो । उनले उक्त निर्णयलाई सर्वोच्च अदालतमा चुनौती दिएका थिए । त्यसपछि अदालतले सिद्धुलाई आक्रमणको दोषी ठहर गर्दै एक हजार रुपैयाँ जरिवाना लगाएको थियो ।
अब अदालतले आफ्नो फैसला परिवर्तन गरेको छ
पीडित परिवारको तर्फबाट सर्वोच्च अदालतमा पुनरावेदन याचिका दायर भएको थियो । त्यसपछि अदालतले आफ्नो फैसला परिवर्तन गर्दै एक वर्षको जेल सजाय सुनाएको हो । क्रिकेटबाट सन्यास लिएपछि सिद्धु राजनीतिमा सक्रिय भए । उनले सन् २००४ मा भाजपाको टिकटमा लोकसभा चुनाव जितेका थिए । उनले सन् २००९ मा पनि जित हासिल गरेका थिए । उनी सन् २०१७ जनवरीमा कांग्रेसमा प्रवेश गरेका थिए ।
