काठमाडौं । एएफसी एसियन कप छनोटको तयारीमो कतारमा रहेको नेपाली राष्ट्रिय फुटबल टिमले आज शनिबार टिमोर लिस्टेसंग मैत्रिपूर्ण खेल खेल्दै छ ।
नेपाल र टिमोर लिस्टेबिचको खेल नेपाली समयअनुसार राति ९ः४५ बजे ग्रान्ड हामद स्टेडियममा हुनेछ । नेपालले कतारको दोहामा दुई मैत्रीपूर्ण खेल खेल्ने तालिका अनुसार पहिलो मैत्रीपूर्ण खेलमा टिमोर लिस्टको सामना गर्न लागेको हो । आजको खेल मैत्रीपूर्ण खेल मात्र भएकाले यसलाई फिफाले मान्यता दिएको छैन ।
यसअघि नेपालले अफगानिस्तानसँग दुई मैत्रीपुर्ण खेल तालिका रहेपनि अन्तः प्रक्रिया नै अघि बढ्न नसक्दाँ मैत्रीपुर्ण खेल हुन नसक्ने भएको थियो ।
कतार फुटबल फेडेरेसन (क्युएफए) ले बुधबार एसियन कपको छनोटको तयारीमा रहेको एसियाका सात टोलीबीच पाँचवटा मैत्रीपूर्ण खेल खेल्ने जनाएको थियो । जस मध्य नेपालले ओमान र टिमोर लिस्टेसँग मैत्रीपूर्ण खेल खेल्न लागेको हो । नेपालले आफ्नो दोस्रो खेलमा जेठ २० गते ओमानसँग खेल्ने छ । ओमानसँगको खेल सुहिम बिन हामद स्टेडियममा नेपाली समयअनुसार राति ९ः४५ बजे हुनेछ ।
कुवेतमा आयोजना हुने एएफसी एसियन कप छनोटको तेस्रो चरण खेल्ने नेपाली राष्ट्रिय फुटबल टोली (बुधबार) कतार प्रस्थान गरेको थियो । नेपाली टोलीले कतारमा करिब ९ दिन तयारी गर्ने छ र त्यसपछि जुन ४ मा कुवेत जाने छन् ।
नियमित कप्तान किरण चेम्जोङसहितका ११ सिनियर खेलाडी बाहिर राख्दै मुख्य प्रशिक्षक अब्दुल्लाह अलमुताईरीले टोली घोषणा गरेपछि नवयुग श्रेष्ठलाई कप्तानको जिम्मेवारी दिईएको छ ।
एएफसी एसियन कप छनोटको तेस्रो चरण अन्तर्गत नेपाल समूह ’ए’ मा रहेको छ । नेपाल रहेको समूहमा कुवेत, इन्डोनेसिया र जोर्डन रहेका छन् । छनोट खेलहरु जुन ८ देखि १४ सम्म हुनेछ ।
नेपालले जुन ८ मा जोर्डनसँग खेल्दै प्रतियोगिताको सुरुवात गर्ने छ । दोस्रो खेलमा११ मा कुवेतको सामना गर्दा नेपालले जुन १४ मा इन्डोनेसियाविरुद्ध खेल्नेछ ।
हरेक समूहका शीर्ष टोली र ५ समूहको उत्कृष्ट दोस्रो टोली चीनमा आयोजना हुने एसियन कप २०२३ मा छनोट हुने छन् ।
नेपाली टोलीः
गोलकिपरः दिप कार्की, बिशाल सुनार, टिकेन्द्र सिंह थापा ।
डिफेन्डरः विकास खवास, विकास तामाङ, गौतम श्रेष्ठ, राजन गुरुङ, शिव गुरुङ, सुमन अर्याल ।
मिडफिल्डरः आकाश बुढा क्षेत्री, एरिक विष्ट, निरकुमार राई, पुजन उपरकोटी, रोशन राना मगर, सन्तोष तामाङ, सेन्सेहाङ आङ्दाम्बे, सुनिल बल, सुरज ज्यू ठकुरी ।
फरवार्डः आयुश घलान, दर्शन गुरुङ, जर्ज प्रिन्स कार्की, मनिष डाँगी र नवयुग श्रेष्ठ ।
