टेक्सास (अमेरिका)– अमेरीकाको टेक्सासका विद्यायकले आप्रवासी (इमिग्रेण्ट) लाई थप कडाई गर्ने कानुनलाई बहुमत द्धारा स्वीकृत गरेका छन् । यो कानुन लागु हुदां प्रहरी र सुरक्षा निकायले बाटोमा हिड्दा हिड्दै पनि शङ्का लागे अमेरिकामा बसोबास गर्न पाउने कागजात छ छैन जाँच गर्न सक्छन् ।
राष्ट्रपति डोनाल्ड ट्रम्पको अनुदार आप्रवासी नीतिलाई सहयोग हुने गरी यो साता राज्यका विद्यायकले यस्तो कानुनलाई स्वीकृत दिएका हुन् । नयाँ कानुनमा आप्रवासी प्रति उदार हुने सुरक्षाकर्मीलाई पक्राउ र जेलमा राख्ने सम्मको व्यवस्था छ । यो कानुनले कतिपय शहरले अपनाउंदै आएको कागजात विहिन पक्राउ परेपनि छाड्ने नीति (सेन्चुरी सिटी)लाई पनि प्रतिबन्ध लगाउने छ ।
टेक्सासका गभर्नर ग्रेग अवोटले यस विद्येयकलाई तत्काल हस्ताक्षर गरी कार्यान्वयन गर्ने प्रविद्धता जनाएका छन् । उनी रिपब्लिकन पार्टीलाई प्रतिनिधित्व गर्दै निर्वाचन भएका गभर्नर हुन् ।
टेक्ससको सिनेटमा रिपव्लिकन पार्टीको बहुमत छ । “तपाईँको अमेरिका बस्ने कानुनी कागजात देखाउनुहोस” भन्ने यो विद्येयक प्रति त्यहाँको प्रतिपक्षी डेमोक्र्याट पार्टीले विरोध जनाएको थियो । यसले भेदभाव पूर्ण व्यवहार गर्ने यो कानुनको विपक्षीको दाबी थियो ।
टेक्सास नेपाली समुुदायको पनि बाक्लो बसाई भएको राज्य हो । यो कानुन कार्यान्वयन हुदां ड्यालस, ह्यूस्टन, अस्टिन लगायत टेक्ससका विभिन्न स्थानमा बस्ने नेपाली पनि प्रभावित हुन सक्छन् । मेक्सिकोसंग सीमा जोडिएको अमेरिकाकै ठुलो मध्ये टेक्सास राज्य रिपव्लिकन पार्टीको प्रभाव क्षेत्र पनि हो ।
अमेरिकामा हाल विभिन्न स्तरमा आप्रावासी माथि कडाई भइरहेको छ । केही दिन अघि कोलोराडो डेनभरका नगर प्रहरी प्रमुखले कागजात विहिन आप्रावासीलाई हिरासतमा लिन इमिग्रेसन प्रहरी आईसीईको सक्रियता बढेको सार्वजनिक गरेका थिए । डेनभरमा एक चर्चमा शरण लिइरहेका एक आप्रावासीलाई बाहिर निस्कदां आईसीईले पक्राउ गरेपछि यसबारेमा व्यापक बहस भएको थियो । अदालतले ती आप्रावासीलाई परिवारसँग बस्न पाउने आदेश दिएपछि उनी हिरासत मुक्त भए ।
डेनभर आप्रावासीप्रति उदार शहर हो । यसका मेयरले आप्रावासीलाई धरपकड हुन नदिने बताउँदै आएका छन् । नगर प्रहरी प्रमुखले पनि मेयरको भनाई अनुसार नै काम गर्ने एक सार्वजनिक कार्यक्रममा बताएका थिए । तर, बासिंटन भने कागजात विहिन आप्रावासी प्रति उदार शहर सेन्चुरी सिटी लार्ई पैसा कम दिएर संजाय दिने पक्षमा उभिएको छ ।
(हिमालयखबरबाट)
